ఆంధ్రప్రదేశ్ ప్రభుత్వ జీవిత బీమా నిధి నియమావళి (APGLI), 2024

తెలుగు లో పూర్తి రూల్స్ కొరకు క్లిక్ చేయండి

అధ్యాయం-1: ప్రాధమికం

రూల్ 1 (సంగ్రహనామం మరియు ప్రారంభం): 

ఈ నియమాలను "ఆంధ్రప్రదేశ్ ప్రభుత్వ జీవిత బీమా నిధి నియమావళి 2024" అంటారు మరియు ఇవి గెజిట్ లో ప్రచురించిన నాటి నుండి అమలులోకి వస్తాయి.

రూల్ 2 (వర్తింపు): 

ప్రభుత్వ రెగ్యులర్ పోస్టుల్లో నియమితులైన ఉద్యోగులకు మాత్రమే ఈ నిబంధనలు వర్తిస్తాయి. కాంట్రాక్ట్, ఔట్ సోర్సింగ్ లేదా రోజువారీ వేతన ఉద్యోగులకు ఇవి వర్తించవు.

రూల్ 3 (నిర్వచనాలు): 

ఈ నియమావళిలో ఉపయోగించే ఏపిజిఎస్ఐ, కుటుంబం, వయస్సు, నామినీ, వేతనం మొదలైన కీలక పదాల యొక్క అర్థాలను ఈ నిబంధన స్పష్టంగా వివరిస్తుంది.

అధ్యాయం - 2: పాలసీ బాండ్లు

రూల్ 4 (తప్పనిసరి చందా): 

బీమా చేయదగిన వయస్సులో ఉన్న ప్రతి ప్రభుత్వ ఉద్యోగి తప్పనిసరిగా ఏపిజిఎస్ఐ (APGLI) కింద సభ్యత్వం తీసుకొని బీమా పొందాలి.

రూల్ 5 (ఉద్యోగి నామినేషన్): 

ఉద్యోగి సర్వీస్ లో ఉన్నప్పుడు ఒకరు లేదా అంతకంటే ఎక్కువ మందిని తన నామినీలుగా మరియు ప్రత్యామ్నాయ నామినీలుగా నియమించాలి. కుటుంబ సభ్యులలో మార్పు (ఉదాహరణకు వివాహం, పిల్లలు పుట్టడం) వస్తే నామినేషన్ మార్చుకోవాలి.

రూల్ 6 (మొదటి పాలసీ బాండ్ జారీ): 

ఉద్యోగి మూల వేతనానికి వర్తించే స్లాబ్ ఆధారంగా మొదటి పాలసీ బాండ్ డీడీఓ (DDO) ద్వారా ఆటోమేటిక్ గా జనరేట్ చేయబడుతుంది.

రూల్ 7 (నెలవారీ ప్రీమియం వసూలు): 

ప్రతి నెలా వేతనం నుండి ప్రీమియం ఆటోమేటిక్ గా మినహాయించబడుతుంది. చూపు కోల్పోవడం, అవయవాల విచ్ఛేదనం వంటి నిర్దిష్ట వైకల్యాలు సంభవిస్తే తప్పనిసరి ప్రీమియం చెల్లింపు నుండి మినహాయింపు లభిస్తుంది.

రూల్ 8 (ఆటోమేటిక్ పెంపు): 

ఇంక్రిమెంట్లు, ప్రమోషన్లు లేదా వేతన సవరణ వల్ల మూల వేతనం తదుపరి స్లాబ్ కు చేరినప్పుడు, తప్పనిసరి ప్రీమియం కూడా ఆటోమేటిక్ గా పెరుగుతుంది.

రూల్ 9 (స్వచ్ఛందంగా పెంచడం): 

ఎంచుకున్న ఉద్యోగులు (దీర్ఘకాలిక వ్యాధులు లేనివారు) స్వచ్ఛందంగా తమ ప్రీమియంను మూల వేతనంలో 8% (వైద్య పరీక్షలు లేకుండా) నుండి 15% (వైద్య పరీక్షలతో) వరకు పెంచుకోవచ్చు.

రూల్ 10 (ప్రీమియం తగ్గింపు): 

ఎట్టి పరిస్థితుల్లోనూ నెలవారీ ప్రీమియంను తగ్గించడానికి అనుమతి లేదు.

రూల్ 11 (సాధారణ నిబంధనలు): 

ఆత్మహత్య చేసుకుంటే పాలసీ చెల్లదు మరియు 80% ప్రీమియం మాత్రమే వెనక్కి ఇస్తారు. తప్పుడు సమాచారం ఇస్తే పాలసీ రద్దు చేసి క్రమశిక్షణా చర్యలు తీసుకుంటారు. ఈ పాలసీలు కోర్టు అటాచ్మెంట్లకు మినహాయింపు కలిగి ఉంటాయి.

అధ్యాయం - 3: రుణాలు

రూల్ 12 (అర్హత ప్రమాణం): 

కనీసం 36 నెలల ప్రీమియం చెల్లించిన వారు మాత్రమే మొదటి రుణం పొందడానికి అర్హులు. బకాయి ఉన్న ప్రీమియం మొత్తం 10% కు మించకూడదు మరియు సరెండర్ విలువలో 90% వరకు రుణం పొందవచ్చు.

రూల్ 13 (రుణ దరఖాస్తు ప్రక్రియ): 

ప్రభుత్వ మార్గదర్శకాల ప్రకారం ఆన్లైన్ ద్వారా మాత్రమే రుణ దరఖాస్తులను ప్రాసెస్ చేయాల్సి ఉంటుంది.

రూల్ 14 (రుణ రికవరీ): 

తీసుకున్న రుణాన్ని 12 నుండి 60 సమాన నెలవారీ వాయిదాలలో (EMI) వడ్డీతో సహా తిరిగి చెల్లించాలి. ఈ వడ్డీ రేటు ఫండ్ బ్యాలెన్స్ పై ఇచ్చే వడ్డీ కంటే 1% ఎక్కువగా ఉంటుంది.

అధ్యాయం - 4: క్లెయిమ్ లు

రూల్ 15 (మెచ్యూరిటీపై క్లెయిమ్): 

పాలసీ మెచ్యూరిటీ తేదీ పూర్తయిన తర్వాత, బీమా మొత్తంతో పాటు అప్పటివరకు జమ అయిన బోనస్ ను పాలసీదారునికి చెల్లిస్తారు.

రూల్ 16 (సరెండర్ పై క్లెయిమ్): 

ముందస్తు పదవీ విరమణ లేదా రాజీనామా వంటి సందర్భాల్లో పాలసీని మెచ్యూరిటీకి ముందే క్లెయిమ్ చేస్తే (సరెండర్), ఆ సరెండర్ విలువతో పాటు బోనస్ కలిపి ఇస్తారు.

రూల్ 17 (మరణంపై క్లెయిమ్): 

పాలసీదారు మరణిస్తే బీమా మొత్తం మరియు బోనస్ నామినీకి లేదా చట్టబద్ధమైన వారసులకు అందుతుంది. నామినీలు లేని పక్షంలో కుటుంబ సభ్యుల ప్రాధాన్యతా క్రమాన్ని ఇందులో వివరించారు.

రూల్ 18 (తప్పిపోయిన సందర్భంలో క్లెయిమ్): 

పాలసీదారు ఆచూకీ 7 సంవత్సరాల పాటు తెలియకపోతే (FIR నమోదు చేసినప్పటి నుండి), పోలీసు ధృవీకరణ మరియు నష్టపరిహార బాండ్ ఆధారంగా క్లెయిమ్ ను డెత్ క్లెయిమ్ లాగానే పరిష్కరిస్తారు.

రూల్ 19 (క్లెయిమ్ చేయని పాలసీలు): 

మెచ్యూరిటీ లేదా మరణం తర్వాత 10 సంవత్సరాల కంటే ఎక్కువ కాలం ఎవరూ క్లెయిమ్ చేయకపోతే, ఆ పాలసీ రద్దు చేయబడి చెల్లనిదిగా పరిగణింపబడుతుంది.

రూల్ 20 (సాధారణ నిబంధనలు): 

ప్రీమియం చెల్లింపు నిలిపివేసిన పాలసీపై క్లెయిమ్ చేస్తే, చెల్లించిన ప్రీమియం బకాయిలో 50% కంటే తక్కువ ఉంటే వడ్డీ లేకుండా అసలు మాత్రమే ఇస్తారు, 50% కంటే ఎక్కువ ఉంటే బకాయిలు వసూలు చేసుకుని క్లెయిమ్ సెటిల్ చేస్తారు.

అధ్యాయం - 5: పరిపాలన

రూల్ 21 (కీలక వాటాదారులు మరియు బాధ్యతలు): 

పాలసీదారుడు, డీడీఓ, ఆఫీస్ హెడ్ మరియు ఏపిజిఎస్ఐ అధికారులు తమకు కేటాయించిన బాధ్యతలను సక్రమంగా నిర్వర్తించాలి, నిర్లక్ష్యం వహిస్తే క్రమశిక్షణా చర్యలు ఎదుర్కోవాల్సి ఉంటుంది.

రూల్ 22 (సమస్యల పరిష్కార విభాగం): 

పాలసీదారుల ఫిర్యాదులను త్వరగా పరిష్కరించడానికి ఏపిజిఎస్ఐ డైరెక్టర్ ఒక మానిటరింగ్ మరియు గ్రీవెన్స్ రిడ్రెసల్ సెల్ ఏర్పాటు చేయాలి.

రూల్ 23 (నిధి నిర్వహణ): 

ఏపిజిఎస్ఐ ఫండ్ ను ఏపిజిఎస్ఐ డైరెక్టర్ పబ్లిక్ అకౌంట్ కింద నిర్వహిస్తారు. దీనిపై జనరల్ ప్రావిడెంట్ ఫండ్ కు సమానమైన వడ్డీ రేటు అర్ధ వార్షికంగా వర్తిస్తుంది.

రూల్ 24 (ఖాతాల నిర్వహణ మరియు ఆడిట్): 

ప్రతి సంవత్సరం అకౌంట్స్, బ్యాలెన్స్ షీట్ మరియు ఆడిట్ నివేదికలను రూపొందించి అకౌంటెంట్ జనరల్ మరియు ప్రభుత్వానికి సమర్పించాలి. బీమా గణకుని నివేదిక ఆధారంగా ప్రభుత్వం బోనస్ ప్రకటిస్తుంది.

అధ్యాయం - 6: ఇతరత్ర అంశాలు

రూల్ 25 (ఆన్లైన్ అప్లికేషన్): 

ఏపిజిఎస్ఐ కార్యకలాపాలను, ప్రక్రియలను మరింత పారదర్శకంగా, వేగంగా చేయడానికి డైరెక్టర్ ఆన్లైన్ విధానాలను ప్రతిపాదించి అమలు చేయవచ్చు.

రూల్ 26 (నియమావళి అర్థ వివరణ): 

ఈ నియమాలపై ఎలాంటి సందేహాలు లేదా అర్థ వివరణ అవసరమైనా ఆర్థిక శాఖ తీసుకునే నిర్ణయమే అంతిమమైనది.

రూల్ 27 (నియమావళిని సడలించే అధికారం): 

ప్రత్యేక కేసులలో న్యాయబద్ధంగా వ్యవహరించడానికి, తగిన కారణాలను లిఖితపూర్వకంగా నమోదు చేసి, నియమాలను సడలించే అధికారం ప్రభుత్వ ఆర్థిక శాఖకు ఉంటుంది.

రూల్ 28 (అవశేష విషయాలను నిబంధించే అధికారం): 

ఈ నియమావళిలో పేర్కొనని కొత్త అంశాలు ఏవైనా ఎదురైతే వాటిపై ప్రభుత్వం లేదా ఆర్థిక శాఖ ఉత్తర్వులు జారీ చేయవచ్చు.

రూల్ 29 (వినియోగదారుల రక్షణ చట్టం నుండి మినహాయింపు): 

పాలసీదారుడు "వినియోగదారుని" పరిధిలోకి రానందున, 2019 వినియోగదారుల రక్షణ చట్టం (Consumer Protection Act) ఈ ఏపిజిఎస్ఐ ప్రయోజనాలకు వర్తించదు.

రూల్ 30 (రద్దు మరియు రక్షణ): 

ఈ కొత్త నియమావళి అమలులోకి రాగానే పాత ఏపిజిఎస్ఐ నిబంధనలు రద్దవుతాయి. అయితే పాత నిబంధనల కింద ఇదివరకే తీసుకున్న చర్యలు మరియు హక్కులు భద్రపరచబడతాయి.

Read More

పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీ చట్టం, 2013 (NPS)

తెలుగు లో పూర్తి చట్టం కొరకు క్లిక్ చేయండి

 అధ్యాయం I: ప్రాథమికం (Preliminary)

సెక్షన్ 1: ఈ చట్టం పేరు (PFRDA Act, 2013), మరియు ఇది భారతదేశమంతటా ఎప్పటినుండి వర్తిస్తుందో తెలుపుతుంది.

సెక్షన్ 2: ఈ చట్టంలో వాడే ముఖ్యమైన పదాలకు (NPS, CRA, చందాదారుడు, పెన్షన్ ఫండ్, PoP వంటివి) స్పష్టమైన నిర్వచనాలను ఇస్తుంది.

అధ్యాయం II: PFRDA అథారిటీ (The Authority)

సెక్షన్ 3: 'పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీ' (PFRDA) అనే రెగ్యులేటరీ సంస్థ స్థాపన, దాని ప్రధాన కార్యాలయం జాతీయ రాజధాని ప్రాంతం (NCR) లో ఉంటుందని వివరిస్తుంది.

సెక్షన్ 4: అథారిటీలో ఒక చైర్‌పర్సన్, ముగ్గురు ఫుల్-టైమ్, ముగ్గురు పార్ట్-టైమ్ సభ్యులు ఉంటారని తెలుపుతుంది.

సెక్షన్ 5: చైర్‌పర్సన్ గరిష్ట వయసు 65 ఏళ్లు, సభ్యుల వయసు 62 ఏళ్లు నిండే వరకు లేదా 5 ఏళ్ల పాటు వారు పదవిలో కొనసాగుతారని చెబుతుంది.

సెక్షన్ 6: దివాలా తీసినా, అవినీతికి పాల్పడినా, అసమర్థులైనా సరే వారిని పదవి నుండి తొలగించే అధికారం కేంద్ర ప్రభుత్వానికి ఉంటుందని నిర్దేశిస్తుంది.

సెక్షన్ 7: పదవీ విరమణ పొందిన తర్వాత చైర్‌పర్సన్ లేదా సభ్యులు రెండేళ్ల వరకు పెన్షన్ రంగంలో లేదా ప్రభుత్వంలో ఎలాంటి ఉద్యోగాలు చేయకూడదనే ఆంక్షలు వివరిస్తుంది.

సెక్షన్ 8: అథారిటీ వ్యవహారాలపై చైర్‌పర్సన్‌కు ఉండే సాధారణ పరిపాలనా అధికారాలను తెలుపుతుంది.

సెక్షన్ 9: అథారిటీ సమావేశాలు ఎలా జరగాలి, మెజారిటీ ఓట్ల ద్వారా నిర్ణయాలు ఎలా తీసుకోవాలి అనేది వివరిస్తుంది.

సెక్షన్ 10: అథారిటీ సభ్యుల నియామకంలో ఏదైనా ఖాళీ లేదా చిన్న లోపం ఉన్నంత మాత్రాన, వారు తీసుకున్న నిర్ణయాలు చెల్లవని అనడానికి వీల్లేదని తెలుపుతుంది.

సెక్షన్ 11: అథారిటీ తన కార్యకలాపాల కోసం అవసరమైన అధికారులను, ఉద్యోగులను నియమించుకునే అధికారాన్ని ఇస్తుంది.

అధ్యాయం III: విస్తరణ మరియు వర్తింపు (Extent and Application)

సెక్షన్ 12: ఈ చట్టం జాతీయ పెన్షన్ వ్యవస్థకు (NPS), ఇతర చట్టాల పరిధిలోకి రాని ఇతర పెన్షన్ స్కీమ్‌లకు వర్తిస్తుందని (EPF లాంటి పాత స్కీమ్‌లకు వర్తించదని) తెలుపుతుంది.

అధ్యాయం IV: ఆస్తులు, అప్పుల బదిలీ (Transfer of Assets)

సెక్షన్ 13: కొత్త PFRDA అథారిటీ ఏర్పడక ముందు ఉన్న తాత్కాలిక (Interim) అథారిటీకి చెందిన ఆస్తులు, అప్పులు అన్నీ కొత్తగా ఏర్పాటైన అథారిటీకి అధికారికంగా బదిలీ అవుతాయని వివరిస్తుంది.

అధ్యాయం V: అథారిటీ విధులు, అధికారాలు (Functions & Powers)

సెక్షన్ 14: NPS ను రెగ్యులేట్ చేయడం, చందాదారుల ప్రయోజనాలను కాపాడటం అథారిటీ ప్రధాన విధి అని, విచారణ సమయంలో దానికి సివిల్ కోర్టుకున్న అధికారాలు ఉంటాయని చెబుతుంది.

సెక్షన్ 15: చందాదారుల రక్షణ కోసం పెన్షన్ సంస్థలకు లేదా సంబంధిత వ్యక్తులకు తగిన ఆదేశాలు (Directions) జారీ చేసే అధికారాన్ని ఇస్తుంది.

సెక్షన్ 16: ఏదైనా పెన్షన్ సంస్థ చట్టం ఉల్లంఘిస్తే, అకౌంట్ బుక్స్ సమర్పించమని కోరి విచారణ (Investigation) జరిపించే అధికారం అథారిటీకి ఉంటుంది.

సెక్షన్ 17: రికార్డులను మాయం చేసే అవకాశం ఉందని అనుమానం వస్తే, అథారిటీ అధికారులు నేరుగా సోదా (Search) చేసి, పత్రాలను జప్తు (Seizure) చేయవచ్చని వివరిస్తుంది.

సెక్షన్ 18: చట్ట ఉల్లంఘనలు జరుగుతుంటే ఆ తప్పులను తక్షణమే ఆపమని (Cease and desist) ఆదేశించే అధికారం.

సెక్షన్ 19: సెంట్రల్ రికార్డ్‌కీపింగ్ ఏజెన్సీ (CRA) లేదా పెన్షన్ ఫండ్ సంస్థలు తప్పుగా వ్యవహరిస్తే, వాటిని పర్యవేక్షించడానికి కేంద్ర ప్రభుత్వ అనుమతితో ఒక అడ్మినిస్ట్రేటర్‌ను నియమించవచ్చని చెబుతుంది.

అధ్యాయం VI: జాతీయ పెన్షన్ వ్యవస్థ (National Pension System)

సెక్షన్ 20: జాతీయ పెన్షన్ వ్యవస్థ (NPS) యొక్క ప్రాథమిక లక్షణాలను (వ్యక్తిగత ఖాతా, నిధుల ఉపసంహరణ పరిమితులు, పోర్టబిలిటీ, నిష్క్రమణ సమయంలో యాన్యుటీ కొనడం) వివరిస్తుంది.

సెక్షన్ 21: రికార్డుల నిర్వహణ కోసం సెంట్రల్ రికార్డ్‌కీపింగ్ ఏజెన్సీని (CRA) నియమించే అధికారాలను తెలుపుతుంది.

సెక్షన్ 22: చందాదారుల నుండి విరాళాలు స్వీకరించడానికి పాయింట్ ఆఫ్ ప్రెజెన్స్ (PoP) కేంద్రాలను నియమించే విధానాన్ని చెబుతుంది.

సెక్షన్ 23: చందాదారుల నిధులను పెట్టుబడిగా పెట్టడానికి పెన్షన్ ఫండ్ సంస్థలను నియమించడం గురించి తెలుపుతుంది.

సెక్షన్ 24: పెన్షన్ ఫండ్లలో విదేశీ కంపెనీల పెట్టుబడుల వాటా (FDI) 26% (లేదా చట్టం అనుమతించిన మేరకు) మించకూడదని పరిమితి విధిస్తుంది.

సెక్షన్ 25: చందాదారుల డబ్బును (పెన్షన్ నిధులను) ఎట్టి పరిస్థితుల్లోనూ విదేశాల్లో పెట్టుబడిగా పెట్టకూడదని నిషేధిస్తుంది.

సెక్షన్ 26: CRA, PoP, పెన్షన్ ఫండ్ వంటి సంస్థలకు ఉండాల్సిన అర్హతలు (కనీస మూలధనం, రికార్డు, ఐటీ సామర్థ్యం) గురించి చెబుతుంది.

అధ్యాయం VII: మధ్యవర్తుల నమోదు (Registration of Intermediaries)

సెక్షన్ 27: PFRDA అథారిటీ వద్ద అధికారికంగా నమోదు (రిజిస్ట్రేషన్) చేసుకోకుండా ఏ సంస్థా తన కార్యకలాపాలు ప్రారంభించకూడదని నియంత్రిస్తుంది.

అధ్యాయం VIII: జరిమానాలు మరియు విచారణ (Penalties and Adjudication)

సెక్షన్ 28: రిజిస్ట్రేషన్ లేకుండా పనిచేసినా లేదా ఖాతాలను నిర్వహించకపోయినా రోజుకు లక్ష రూపాయల నుండి కోటి రూపాయల వరకు జరిమానా (Penalty) విధించవచ్చని వివరిస్తుంది.

సెక్షన్ 29: ఫైన్ల ద్వారా అథారిటీకి వచ్చిన డబ్బును, సబ్‌స్క్రైబర్ ఎడ్యుకేషన్ అండ్ ప్రొటెక్షన్ ఫండ్‌కు జమ చేయాలని చెబుతుంది.

సెక్షన్ 30: జరిమానాలు విధించే ముందు పూర్తి విచారణ జరిపేందుకు ఒక విచారణాధికారిని (Adjudicating Officer) నియమించడం గురించి తెలుపుతుంది.

సెక్షన్ 31: చందాదారుల సొమ్మును దారి మళ్లిస్తే సంస్థల ఆస్తులను జప్తు చేసే లేదా ఆ సంస్థ బోర్డును రద్దు చేసే అధికారాన్ని అథారిటీకి ఇస్తుంది.

సెక్షన్ 32: ఈ చట్టాన్ని ఉల్లంఘిస్తే పదేళ్ల జైలు శిక్ష లేదా ఇరవై ఐదు కోట్ల వరకు జరిమానా విధించవచ్చనే కఠినమైన క్రిమినల్ నేరాల సెక్షన్.

సెక్షన్ 33: నేరం చేసిన వ్యక్తి స్వచ్ఛందంగా నిజం ఒప్పేసుకుంటే, క్రిమినల్ ప్రాసిక్యూషన్ నుండి మినహాయింపు (Immunity) ఇచ్చే అవకాశం కేంద్ర ప్రభుత్వానికి ఉంటుంది.

సెక్షన్ 34: అథారిటీ (PFRDA) సంపాదించే ఆదాయం లేదా లాభాలపై ఎలాంటి ఆదాయపు పన్ను, సంపద పన్ను వర్తించదని మినహాయింపు ఇస్తుంది.

సెక్షన్ 35: అథారిటీ ఫిర్యాదు చేస్తే తప్ప కోర్టులు జోక్యం చేసుకోకూడదని, అలాగే సెషన్స్ కోర్టు కంటే తక్కువ స్థాయి కోర్టులు ఈ కేసులను విచారించకూడదని నిర్దేశిస్తుంది.

సెక్షన్ 36: PFRDA తీర్పులపై అభ్యంతరం ఉంటే 45 రోజుల్లోపు సెక్యూరిటీస్ అప్పిలేట్ ట్రిబ్యునల్ (SAT) కు అప్పీల్ చేసుకోవచ్చని తెలుపుతుంది.

సెక్షన్ 37: ఈ చట్టం పరిధిలోని వ్యవహారాలలో సాధారణ సివిల్ కోర్టులు ఎలాంటి ఇంజంక్షన్లు ఇవ్వడానికి వీల్లేదని పరిమితం చేస్తుంది.

సెక్షన్ 38: SAT ఇచ్చిన తీర్పుపై కూడా అభ్యంతరం ఉంటే, చట్టపరమైన ప్రశ్నపై 60 రోజుల్లో సుప్రీంకోర్టుకు వెళ్లే అవకాశాన్ని కల్పిస్తుంది.

అధ్యాయం IX: ఆర్థికం, ఖాతాలు మరియు ఆడిట్ (Finance, Accounts and Audit)

సెక్షన్ 39: PFRDA నిర్వహణ కోసం కేంద్ర ప్రభుత్వం నేరుగా నిధులను (గ్రాంట్లను) ఇస్తుందని చెబుతుంది.

సెక్షన్ 40: అధికారుల జీతాలు, నిర్వహణ ఖర్చుల కోసం PFRDA కి వచ్చే ఫీజులతో సొంతంగా ఒక నిధిని (రెగ్యులేటరీ అండ్ డెవలప్‌మెంట్ ఫండ్) ఏర్పాటు చేసుకోవడాన్ని వివరిస్తుంది.

సెక్షన్ 41: చందాదారుల అవగాహన, రక్షణ కోసం జరిమానాల ద్వారా వచ్చిన డబ్బుతో ప్రత్యేకంగా 'సబ్‌స్క్రైబర్ ఎడ్యుకేషన్ ఫండ్' ఏర్పాటును తెలుపుతుంది.

సెక్షన్ 42: PFRDA ఖాతాలను కంప్ట్రోలర్ అండ్ ఆడిటర్-జనరల్ (CAG) తో ప్రతి ఏటా ఆడిట్ చేయించి పార్లమెంటుకు సమర్పించాలని నిర్దేశిస్తుంది.

అధ్యాయం X: ఇతర ముఖ్య అంశాలు (Miscellaneous)

సెక్షన్ 43: విధానపరమైన (పాలసీ) విషయాల్లో కేంద్ర ప్రభుత్వం అథారిటీకి ఇచ్చే ఆదేశాలను PFRDA తప్పనిసరిగా పాటించాల్సి ఉంటుందని స్పష్టం చేస్తుంది.

సెక్షన్ 44: PFRDA తన విధుల్లో పదేపదే విఫలమైతే కేంద్ర ప్రభుత్వం ఆ అథారిటీని రద్దు (Super sede) చేసి, తన ఆధీనంలోకి తీసుకునే అధికారాన్ని తెలియజేస్తుంది.

సెక్షన్ 45: పెన్షన్ విధానాలపై సలహాలు ఇవ్వడానికి వివిధ రంగాలకు చెందిన 25 మందితో కూడిన 'పెన్షన్ సలహా కమిటీ' ఏర్పాటును వివరిస్తుంది.

సెక్షన్ 46: ప్రతి ఆర్థిక సంవత్సరం పూర్తయ్యాక, PFRDA తన వార్షిక నివేదికను కేంద్ర ప్రభుత్వానికి, పార్లమెంటుకు సమర్పించాలని తెలుపుతుంది.

సెక్షన్ 47: PFRDA సభ్యులు, అధికారులు, ఉద్యోగులందరూ చట్టం దృష్టిలో పబ్లిక్ సర్వెంట్లు (ప్రభుత్వ సేవకులు) గానే పరిగణించబడతారని తెలుపుతుంది.

సెక్షన్ 48: చట్టం అమలులో సదుద్దేశంతో చేసిన పనుల వల్ల ఏవైనా ఇబ్బందులు జరిగితే అధికారులపై సివిల్ లేదా క్రిమినల్ కేసులు వేయడానికి వీల్లేదని వారికి రక్షణ కల్పిస్తుంది.

సెక్షన్ 49: అథారిటీకి ఉన్న కొన్ని అధికారాలను పనులు సులభతరం చేయడం కోసం ఇతర సభ్యులకు లేదా కమిటీలకు బదిలీ (Delegation) చేసుకునే వెసులుబాటు ఇస్తుంది.

సెక్షన్ 50: పెన్షన్ స్కీమ్ అమలులో సంస్థలు/కంపెనీలు తప్పు చేస్తే ఆ కంపెనీతో పాటుగా మేనేజర్లు, డైరెక్టర్లు కూడా శిక్షార్హులవుతారని తెలుపుతుంది.

సెక్షన్ 50A: PFRDA అధికారాలు 'ఇంటర్నేషనల్ ఫైనాన్షియల్ సర్వీసెస్ సెంటర్‌'కు (IFSC కి) వర్తించవని ఒక ప్రత్యేక సవరణ ద్వారా వివరిస్తుంది.

సెక్షన్ 51: చట్టాన్ని అమలు చేయడం కోసం అవసరమైన రూల్స్‌ను (నియమాలను) రూపొందించే అధికారం కేంద్ర ప్రభుత్వానికి ఉంటుందని చెబుతుంది.

సెక్షన్ 52: తమ రోజువారీ కార్యకలాపాలను, ఫండ్స్ నిర్వహణను నియంత్రించడానికి రెగ్యులేషన్స్ (నిబంధనలు) చేసుకునే పవర్ అథారిటీకి (PFRDA కు) ఉంటుందని ఇస్తుంది.

సెక్షన్ 53: కేంద్రం చేసిన రూల్స్, PFRDA చేసిన నిబంధనలను కచ్చితంగా 30 రోజుల పాటు పార్లమెంటు ఉభయ సభల ఆమోదం కోసం ఉంచాలని స్పష్టం చేస్తుంది.

సెక్షన్ 54: చట్టం అమలులో ఆరంభంలో వచ్చే ఇబ్బందులను తొలగించడానికి (మొదటి ఐదేళ్ల వరకు) కేంద్ర ప్రభుత్వం ప్రత్యేక ఉత్తర్వులు ఇవ్వొచ్చని చెబుతుంది.

సెక్షన్ 55: ఈ PFRDA చట్టం ఇతర చట్టాలకు అదనంగా ఉంటుందే తప్ప, పాత చట్టాల అధికారాలను రద్దు చేయదని వివరిస్తుంది.

సెక్షన్ 56: ఈ చట్టం పూర్తిస్థాయిలో రాకముందు 'మధ్యంతర PFRDA' తీసుకున్న పాత నిర్ణయాలన్నీ చట్టబద్ధమేనని వాటికి రక్షణ (Savings) కల్పిస్తుంది.

Read More

ఆంధ్రప్రదేశ్ జనరల్ ప్రావిడెంట్ ఫండ్ రూల్స్, 1935

తెలుగు లో పూర్తి నియమాల కోసం క్లిక్ చేయండి

ప్రారంభం & నిర్వచనాలు

• రూల్ 1 (పేరు & అమలు): వీటిని 'జనరల్ ప్రావిడెంట్ ఫండ్ (ఆంధ్రప్రదేశ్) రూల్స్' అంటారు. ఇవి 1935 నుంచి అమలులోకి వచ్చాయి.

• రూల్ 2 (నిర్వచనాలు): ఇందులో ఖాతా అధికారి (Accounts Officer), కుటుంబం, జీతం (వేతనం) లాంటి ముఖ్యమైన పదాలకు అర్థాలు చెప్పారు. (ఉదాహరణకు: కుటుంబం అంటే భార్య/భర్త, పిల్లలు, తల్లిదండ్రులు).

• రూల్ 3 (కరెన్సీ): ఈ ఫండ్ లావాదేవీలన్నీ మన భారతీయ రూపాయలలోనే జరుగుతాయి.

• రూల్ 4: (ఈ రూల్ తొలగించబడింది).

ఎవరు చేరాలి & నామినేషన్

• రూల్ 5 (ఎవరు చేరాలి): సెప్టెంబర్ 1, 2004 కంటే ముందు ఉద్యోగంలో చేరిన ప్రభుత్వ ఉద్యోగులందరికీ ఇది తప్పనిసరి. ఆ తర్వాత చేరిన వారికి ఇది వర్తించదు (వారికి CPS ఉంది కాబట్టి).

• రూల్ 6: (తొలగించబడింది).

• రూల్ 7 (నామినేషన్): ఫండ్‌లో చేరిన వెంటనే మన ఖాతాకు నామినీని ప్రకటించాలి. కుటుంబం ఉంటే కచ్చితంగా కుటుంబ సభ్యులనే నామినీగా పెట్టాలి.

చందాలు (Subscriptions)

• రూల్ 8 (ఖాతా): ప్రతి ఉద్యోగి పేరు మీద ఒక ఖాతా ఉంటుంది. కట్టిన చందాలు, వడ్డీ అందులోనే కనిపిస్తాయి.

• రూల్ 9 (చందా ఎప్పుడు కట్టాలి): ప్రతి నెలా తప్పనిసరిగా చందా కట్టాలి. కానీ, జీతం లేని సెలవులో ఉన్నప్పుడు లేదా సస్పెన్షన్‌లో ఉన్నప్పుడు కట్టకపోయినా పర్వాలేదు. రిటైర్మెంట్‌కి 4 నెలల ముందు కట్టడం ఆపేయాలి.

• రూల్ 10 (చందా రేట్లు): కనీసం జీతంలో 6% కట్టాలి. ఏడాదికి ఒకసారి ఈ చందా శాతాన్ని తగ్గించుకోవచ్చు, లేదా రెండుసార్లు పెంచుకోవచ్చు.

• రూల్ 11 (డిప్యుటేషన్): ఫారిన్ సర్వీస్ లేదా వేరే చోట డిప్యుటేషన్ మీద వెళ్లినా కూడా ఈ రూల్స్ అన్నీ వర్తిస్తాయి.

• రూల్ 12 (వసూలు): ప్రతి నెలా జీతం నుంచే నేరుగా చందా డబ్బులు కట్ అవుతాయి.

వడ్డీ & అడ్వాన్సులు

• రూల్ 13 (వడ్డీ): ప్రభుత్వం నిర్ణయించిన రేటు ప్రకారం మన ఖాతాలోని డబ్బులకు ఏటా వడ్డీ ఆటోమెటిక్‌గా జమ అవుతుంది.

• రూల్ 14 (తాత్కాలిక అడ్వాన్సులు): అనారోగ్యం, పిల్లల చదువులు, పెళ్లిళ్లు, ఇల్లు కట్టుకోవడం లేదా న్యాయపరమైన కేసుల కోసం... 3 నెలల జీతం లేదా ఖాతాలో ఉన్న సగం డబ్బును (ఏది తక్కువైతే అది) అడ్వాన్స్‌గా తీసుకోవచ్చు.

• రూల్ 15 (అడ్వాన్స్ రికవరీ): అలా తీసుకున్న అడ్వాన్స్‌ను 12 నుంచి 24 వాయిదాల్లో తిరిగి జీతం నుంచి కట్ చేస్తారు.

పాక్షిక-తుది ఉపసంహరణలు (Part-Final Withdrawals) - తిరిగి చెల్లించనవసరం లేనివి

• రూల్ 15-A: 15 లేదా 20 ఏళ్ల సర్వీస్ పూర్తయ్యాక, లేదా రిటైర్మెంట్‌కి పదేళ్లు ఉన్నప్పుడు చదువు, పెళ్లిళ్లు, అనారోగ్యం, ఇల్లు కోసం ఈ డబ్బు తీసుకోవచ్చు. దీన్ని తిరిగి కట్టాల్సిన పనిలేదు.

• రూల్ 15-B: పిల్లల ఉన్నత చదువుల కోసం (విదేశీ విద్యతో సహా) తీసుకోవచ్చు.

• రూల్ 15-C: అనారోగ్య ఖర్చుల కోసం తీసుకోవచ్చు.

• రూల్ 15-D: పిల్లల లేదా కుటుంబంలోని ఆడపడుచుల పెళ్లిళ్లు, నిశ్చితార్థం కోసం వాడొచ్చు.

• రూల్ 15-E: కొత్త ఇల్లు కొనుక్కోవడానికి లేదా కట్టుకోవడానికి వాడుకోవచ్చు.

• రూల్ 15-F & 15-G: ఇంటి స్థలం కొనడానికి, ఆ స్థలంలో ఇల్లు కట్టడానికి ఈ రూల్స్ కింద డబ్బు ఇస్తారు.

• రూల్ 15-H: రిటైర్మెంట్‌కి 6 నెలల ముందు.. వ్యవసాయ భూమి లేదా వ్యాపారం చేసుకోవడానికి స్థలం కొనుక్కోవడానికి డ్రా చేసుకోవచ్చు.

• రూల్ 15-I: సర్వీస్ చివర్లో కారు కొనుక్కోవడానికి కూడా తీసుకోవచ్చు.

• రూల్ 15-J (మార్పు): ఇదివరకే అడ్వాన్స్ తీసుకుని, దాన్ని కట్టలేని పరిస్థితుల్లో ఉంటే... ఆ అడ్వాన్స్‌ను "పాక్షిక ఉపసంహరణ"గా మార్చుకోవచ్చు.

జీవిత బీమా / LIC పాలసీలు

• రూల్ 16 నుంచి 26-A వరకు: పీఎఫ్ ఖాతాలో కట్టాల్సిన చందాకి బదులుగా, నేరుగా ఆ డబ్బుతో ఎల్‌ఐసీ (LIC) లేదా ఇతర జీవిత బీమా పాలసీల ప్రీమియం కట్టుకునే వీలు ఈ రూల్స్ కల్పిస్తాయి. కానీ ఆ పాలసీ బాండ్లను ప్రభుత్వానికి (గవర్నర్‌కు) ష్యూరిటీగా అప్పగించాలి. రిటైర్ అయ్యాక వాటిని తిరిగి మనకే ఇచ్చేస్తారు. (అయితే 1979 తర్వాత తీసుకున్న కొత్త పాలసీలకు ఈ సదుపాయం ఆపేశారు).

తప్పుగా వాడితే రికవరీ

• రూల్ 27 & 27-A: ఇల్లు కడతాను అని చెప్పి డబ్బులు డ్రా చేసి వేరే దానికి వాడితే (కారణం తప్పుగా చూపిస్తే), ఆ డబ్బు మొత్తాన్ని ఒకేసారి జీతం నుంచి రికవరీ చేస్తారు.

తుది చెల్లింపులు (Final Payments)

• రూల్ 28 & 29: ఉద్యోగి రిటైర్ అయినప్పుడు, విరామం తీసుకున్నప్పుడు లేదా ఉద్యోగం మానేసినప్పుడు ఖాతాలో ఉన్న డబ్బునంతటినీ వడ్డీతో సహా ఇచ్చేస్తారు.

• రూల్ 30 (మరణిస్తే): దురదృష్టవశాత్తూ ఉద్యోగి సర్వీసులో ఉండగా చనిపోతే, ఆ డబ్బును నామినీకి ఇస్తారు. నామినీ లేకపోతే కుటుంబ సభ్యులకు సమానంగా పంచుతారు.

• రూల్ 30-A (బూస్టర్ స్కీమ్): 5 ఏళ్ళ సర్వీస్ పూర్తయి, ఖాతాలో కనీస బ్యాలెన్స్ మెయింటైన్ చేస్తూ సర్వీసులో చనిపోతే... ఖాతాలోని డబ్బుతో పాటు, అదనంగా రూ.20,000 వరకు కుటుంబానికి అదనపు సహాయంగా ఇస్తారు.

పరిష్కారం & బదిలీలు

• రూల్ 31 (చెల్లింపు విధానం): రిటైర్ అయ్యే సంవత్సరానికి ముందే తుది చెల్లింపు కోసం దరఖాస్తు చేసుకోవాలి. మతిస్థిమితం లేని వారికి కోర్టు నియమించిన సంరక్షకుల ద్వారా డబ్బు ఇస్తారు.

• రూల్ 32, 32-A, 32-B (బదిలీలు): మన రాష్ట్ర ప్రభుత్వం నుంచి వేరే రాష్ట్ర లేదా కేంద్ర ప్రభుత్వ ఉద్యోగానికి లేదా కార్పొరేట్ సంస్థలకు బదిలీ అయితే, మన ఖాతాలోని డబ్బు అక్కడి పీఎఫ్ ఖాతాకు బదిలీ అవుతుంది.

అడ్మినిస్ట్రేషన్

• రూల్ 33: ఈ డబ్బులన్నీ ప్రభుత్వ ఖాతాలలో "ది జనరల్ ప్రావిడెంట్ ఫండ్" కింద భద్రంగా ఉంటాయి.

• రూల్ 34: ప్రతి చందాదారుడికి కచ్చితంగా ఒక అకౌంట్ నంబర్ ఉంటుంది.

• రూల్ 35 (వార్షిక స్టేట్‌మెంట్): ప్రతి సంవత్సరం చివర్లో మీ ఖాతాలో ఎంత డబ్బు జమ అయ్యింది, ఎంత వడ్డీ వచ్చింది అని తెలిపే స్టేట్‌మెంట్‌ను మీకు పంపుతారు. అందులో తప్పులు ఉంటే 3 నెలల్లోపు కంప్లైంట్ చేయొచ్చు.

Read More

మార్చి 28న 'స్వర్ణాంధ్ర - స్వచ్ఛ ఆంధ్ర' కార్యక్రమం: 'జీరో వేస్ట్' దిశగా అడుగులు

అమరావతి: ఆంధ్రప్రదేశ్ ప్రభుత్వం ప్రతిష్టాత్మకంగా చేపట్టిన "స్వర్ణాంధ్ర - స్వచ్ఛ ఆంధ్ర" (SASA) కార్యక్రమం ఈ నెల 28వ తేదీన (శనివారం) బాపట్ల జిల్లాలోని చీరాలలో ఘనంగా జరగనుంది. గౌరవ ముఖ్యమంత్రి గారు స్వయంగా పాల్గొననున్న ఈ కార్యక్రమం కోసం స్వచ్ఛ ఆంధ్ర కార్పొరేషన్ మేనేజింగ్ డైరెక్టర్ బి. అనిల్ కుమార్ రెడ్డి, ఐ.ఏ.ఎస్. గారు అన్ని జిల్లాల కలెక్టర్లకు కీలక ఆదేశాలు జారీ చేశారు. (లేఖ కొరకు క్లిక్ చేయండి)

ఈ నెల థీమ్: "జీరో వేస్ట్ ఇన్‌స్టిట్యూషన్స్" (వ్యర్థ రహిత సంస్థలు)

మార్చి 2026 నెలకు గాను "జీరో వేస్ట్ ఇన్‌స్టిట్యూషన్స్" అనే థీమ్‌ను ప్రభుత్వం ఖరారు చేసింది. ప్రభుత్వ కార్యాలయాలు, పాఠశాలలు, ఆసుపత్రులు, అంగన్‌వాడీలు మరియు హాస్టళ్లను సంపూర్ణ వ్యర్థ రహిత సంస్థలుగా మార్చడమే ఈ నెల ప్రధాన లక్ష్యం.

చేపట్టాల్సిన ప్రధాన కార్యక్రమాలు:

ఈ ప్రత్యేక డ్రైవ్‌లో భాగంగా అన్ని ప్రభుత్వ సంస్థల్లో ఈ క్రింది పనులను చేపట్టాలని ఆదేశించారు:

చెత్త విభజన: తడి, పొడి మరియు గృహ ప్రమాదకర వ్యర్థాలను 100% మూలంలోనే వేరు చేయడం.

స్థానికంగానే పరిష్కారం: తడి వ్యర్థాలను కంపోస్టింగ్ లేదా బయోగ్యాస్ యూనిట్ల ద్వారా అక్కడికక్కడే రీసైక్లింగ్ చేయడం.

పర్యావరణ హితం: ప్లాస్టిక్ రహిత క్యాంపస్‌లను ప్రోత్సహించడం మరియు ఒకేసారి వాడి పారేసే ప్లాస్టిక్‌ను నివారించడం.

విద్యుత్ మరియు నీటి పొదుపు: ఎల్.ఈ.డి (LED) బల్బుల వాడకం, సోలార్ ఎనర్జీ మరియు వర్షపు నీటి నిల్వ పద్ధతులను అవలంబించడం.

హరిత క్యాంపస్: కిచెన్ గార్డెన్స్ మరియు మొక్కలు నాటే కార్యక్రమాలను నిర్వహించడం.

నిర్వహించాల్సిన పోటీలు: ఉద్యోగులు మరియు విద్యార్థుల్లో ఉత్సాహాన్ని నింపేందుకు ఈ క్రింది విభాగాల్లో పోటీలు నిర్వహించనున్నారు:

ఉత్తమ జీరో వేస్ట్ ఇన్‌స్టిట్యూషన్ (Best Zero Waste Institution).

అత్యంత హరిత క్యాంపస్ (Greenest Campus).

ఉత్తమంగా నిర్వహించబడుతున్న ప్రభుత్వ కార్యాలయం/ఆసుపత్రి.

అమలు మరియు పర్యవేక్షణ:

ఈ కార్యక్రమ పర్యవేక్షణ కోసం ప్రతి జిల్లాలో చీఫ్ ప్లానింగ్ ఆఫీసర్ (CPO) జిల్లా నోడల్ ఆఫీసర్‌గా వ్యవహరిస్తారు. క్షేత్రస్థాయిలో జరిగే కార్యక్రమాలను ఫోటోలు, వీడియోల రూపంలో SASA యాప్‌లో ఎప్పటికప్పుడు అప్‌లోడ్ చేయాల్సి ఉంటుంది.

ప్రజలు, స్వచ్ఛంద సంస్థలు (SHGs), మరియు స్థానిక ప్రతినిధులు ఈ కార్యక్రమంలో పెద్ద ఎత్తున పాల్గొని మన రాష్ట్రాన్ని పరిశుభ్రంగా తీర్చిదిద్దాలని ప్రభుత్వం కోరుతోంది.

Read More

SGSW ఉద్యోగులకు AAS ఎప్పటి నుండి వర్తిస్తుంది?

ప్రభుత్వ నిబంధనల ప్రకారం, ఒకే కేడర్‌లో పదోన్నతి (Promotion) అవకాశం పొందకుండా నిర్ణీత కాలం పాటు సర్వీస్ పూర్తి చేసిన ఉద్యోగులకు ఆటోమేటిక్ అడ్వాన్స్‌మెంట్ స్కీమ్ కింద స్పెషల్ గ్రేడ్ స్కేల్స్ (6, 12, 18, 24, 30 సంవత్సరాలు) మంజూరు చేస్తారు. సచివాలయ ఉద్యోగులకు ఈ స్కీమ్ వర్తించే తీరు మరియు సర్వీస్ లెక్కింపు పద్ధతి ఇక్కడ వివరించడమైనది:

1. సర్వీస్ లెక్కింపు నిబంధన (FR 26):

ఫండమెంటల్ రూల్ (FR) 26 ప్రకారం, ఒక ఉద్యోగికి వార్షిక ఇంక్రిమెంట్‌ను లెక్కించడానికి ఏ సర్వీస్‌ను పరిగణనలోకి తీసుకుంటారో, AAS ప్రయోజనాలకు కూడా అదే సర్వీస్‌ను ప్రామాణికంగా తీసుకోవాలి. సాధారణంగా రెగ్యులర్ టైమ్ స్కేల్ (Regular Pay Scale) లో కొనసాగిన సర్వీస్ మాత్రమే ఇంక్రిమెంట్‌కు మరియు తద్వారా AAS కు అర్హత పొందుతుంది.

2. సచివాలయ ఉద్యోగుల ప్రస్తుత స్థితి:

సచివాలయ ఉద్యోగులు విధుల్లో చేరిన మొదటి రెండు సంవత్సరాలు (ప్రొబేషన్ కాలం) కన్సాలిడేటెడ్ పే (Consolidated Pay) పై పనిచేశారు. వీరికి రెగ్యులర్ టైమ్ స్కేల్ జీతం 01.07.2022 నుండి అమలులోకి వచ్చింది.

ప్రస్తుత నిబంధనల ప్రకారం: మీ 6 సంవత్సరాల AAS సర్వీస్‌ను టైమ్ స్కేల్ ప్రారంభమైన తేదీ (అంటే 01.07.2022) నుండి లెక్కించాల్సి ఉంటుంది. ఈ లెక్కన 01.07.2028 నాటికి మీరు 6 సంవత్సరాల స్పెషల్ గ్రేడ్ (SGP) కు అర్హత పొందుతారు.

3. మార్పులకు గల అవకాశాలు:

ప్రభుత్వం నుండి భవిష్యత్తులో వచ్చే ఉత్తర్వులను బట్టి ఈ కాలపరిమితి మారే అవకాశం ఉంది:

నోషనల్ ఇంక్రిమెంట్లు: సచివాలయ ఉద్యోగుల ప్రొబేషన్ కాలాన్ని కూడా సర్వీస్‌గా పరిగణించి, ఆ కాలానికి 'నోషనల్ ఇంక్రిమెంట్లు' మంజూరు చేసే ప్రతిపాదన ప్రస్తుతం ప్రభుత్వం వద్ద పరిశీలనలో ఉంది. ఒకవేళ ప్రభుత్వం దీనికి అంగీకరిస్తే, మీరు విధుల్లో చేరిన తేదీ నుండే 6 ఏళ్ల సర్వీస్‌ను లెక్కించే అవకాశం ఉంటుంది.

ప్రత్యేక ఉత్తర్వులు: AAS/స్పెషల్ గ్రేడ్ మంజూరు కోసం విధుల్లో చేరిన తేదీనే పరిగణనలోకి తీసుకోవాలని ప్రభుత్వం ప్రత్యేకంగా జీవో (G.O) జారీ చేసిన పక్షంలో కూడా, మీకు 2025 అక్టోబర్ నాటికే ఈ ప్రయోజనం లభిస్తుంది.

ప్రస్తుతం ఉన్న నిబంధనల ప్రకారం, టైమ్ స్కేల్‌లో ప్రవేశించిన తేదీ (01.07.2022) నుండే మీ 6 సంవత్సరాల అర్హత కాలం ప్రారంభమవుతుంది.

Read More

ప్రభుత్వ మరియు గురుకుల జూనియర్ లెక్చరర్ల గెజిటెడ్ హోదా

ప్రభుత్వ జూనియర్ కళాశాలల్లో పనిచేసే లెక్చరర్లకు మరియు గురుకుల (Societies) పరిధిలో పనిచేసే లెక్చరర్లకు వేతనం, అర్హతలు మరియు నియామక పరీక్షలు ఒకేలా ఉన్నప్పటికీ, 'గెజిటెడ్' హోదా విషయంలో ఉన్న వ్యత్యాసానికి ప్రధాన కారణాలు ఇక్కడ ఉన్నాయి:

1. ప్రభుత్వ గెజిట్ ప్రకటన (Notification in Official Gazette):

నియమ నిబంధనల ప్రకారం, ఏ అధికారి నియామక వివరాలైతే ప్రభుత్వం అధికారికంగా విడుదల చేసే "స్టేట్ గెజిట్" (State Gazette) లో ప్రచురించబడతాయో, వారిని మాత్రమే 'గెజిటెడ్ అధికారులు'గా పరిగణిస్తారు. సాధారణంగా ప్రభుత్వ శాఖల (Government Departments) పరిధిలోకి వచ్చే క్లాస్-1 మరియు క్లాస్-2 అధికారుల నియామకాలు మాత్రమే గెజిట్‌లో ప్రచురితమవుతాయి.

2. ప్రభుత్వ శాఖ vs స్వయంప్రతిపత్తి సంస్థలు (Government Dept vs Autonomous Bodies):

ప్రభుత్వ జేఎల్ (General JLs): వీరు నేరుగా ప్రభుత్వ విద్యాశాఖ (Department of Higher/Intermediate Education) పరిధిలోకి వస్తారు. వీరు ప్రభుత్వ సర్వీస్ రూల్స్ ప్రకారం నేరుగా ప్రభుత్వ ఉద్యోగులుగా పరిగణించబడతారు.

గురుకుల జేఎల్ (Gurukulam JLs): గురుకులాలు అనేవి ప్రభుత్వ ఆధ్వర్యంలో నడిచే స్వయంప్రతిపత్తి కలిగిన సొసైటీలు (Autonomous Societies/Corporations). వీటి నిర్వహణ కోసం ప్రభుత్వం ప్రత్యేక బోర్డులను ఏర్పాటు చేస్తుంది. సొసైటీ బైలాస్ (By-laws) ప్రకారం నియామకాలు జరుగుతాయి తప్ప, ఇవి ప్రభుత్వ నేరుగా నిర్వహించే 'శాఖలు' కావు. అందుకే వీటి నియామకాలను ప్రభుత్వం గెజిట్‌లో ప్రచురించదు.

3. వేతనం మరియు హోదా మధ్య వ్యత్యాసం:

వేతన స్కేలు (Pay Scale) మరియు హోదా (Status) అనేవి రెండు వేర్వేరు అంశాలు. ప్రభుత్వ రంగ సంస్థలు (PSUs), కార్పొరేషన్లు లేదా సొసైటీలలో పనిచేసే వారికి ప్రభుత్వ అధికారులతో సమానంగా లేదా అంతకంటే ఎక్కువ వేతనం ఉండవచ్చు, కానీ వారు గెజిట్ పరిధిలోకి రానంత వరకు వారిని గెజిటెడ్ అధికారులుగా గుర్తించే అవకాశం ఉండదు.

Read More

ప్రభుత్వ ఉద్యోగుల జీతం లో GPF మరియు ఆదాయపు పన్ను (Income Tax) మినహాయింపులు

ప్రభుత్వ ఉద్యోగుల వేతనం నుండి రికవరీ అయ్యే సాధారణ భవిష్య నిధి (GPF) మరియు ఆదాయపు పన్నుకు సంబంధించి అనుసరించాల్సిన ముఖ్యమైన నిబంధనలు మరియు కాలపరిమితులు క్రింది విధంగా ఉన్నాయి:

సాధారణ భవిష్య నిధి (GPF) చందా నిబంధనలు:

జీపీఎఫ్ నిబంధనల ప్రకారం, ఒక ఉద్యోగి తన నెలవారీ చందాను (Subscription) ఆర్థిక సంవత్సరంలో మార్చుకోవడానికి స్పష్టమైన పరిమితులు ఉన్నాయి. ఉద్యోగి తన చందాను ఒక ఆర్థిక సంవత్సరంలో గరిష్టంగా రెండు సార్లు పెంచుకోవడానికి (Enhancement) అవకాశం ఉంటుంది. అయితే, చందాను తగ్గించుకోవడానికి (Reduction) మాత్రం సంవత్సరంలో ఒకసారి మాత్రమే అనుమతి ఉంటుంది. ఈ మార్పులు చేయడానికి ఎటువంటి నిర్దిష్ట మాస నిబంధన లేదు; ఉద్యోగి తన ఆర్థిక వెసులుబాటును బట్టి ఏ నెలలోనైనా జీతం బిల్లుల తయారీ సమయంలో ఈ మార్పులు చేసుకోవచ్చు.

ఆదాయపు పన్ను (Income Tax) రికవరీ నిబంధనలు:

ఆదాయపు పన్ను చట్టం, 1961లోని సెక్షన్ 192 ప్రకారం, ప్రతి ఉద్యోగి యొక్క వార్షిక ఆదాయాన్ని ఆర్థిక సంవత్సరం ప్రారంభంలోనే అంచనా వేసి, దానికి తగిన పన్నును 12 నెలల కాలంలో రికవరీ (TDS) చేయాల్సి ఉంటుంది. పన్ను రికవరీ అనేది క్రమపద్ధతిలో సాగడానికి ఆదాయపు పన్ను శాఖ కొన్ని లక్ష్యాలను నిర్దేశించింది:

మొదటి త్రైమాసికం (జూన్ ముగిసే నాటికి): మొత్తం అంచనా వేసిన పన్నులో కనీసం 15 శాతం రికవరీ పూర్తి కావాలి.

రెండవ త్రైమాసికం (సెప్టెంబర్ ముగిసే నాటికి): మొత్తం పన్నులో 45 శాతం రికవరీ పూర్తి చేయాలి.

మూడవ త్రైమాసికం (డిసెంబర్ ముగిసే నాటికి): మొత్తం పన్నులో 75 శాతం రికవరీ పూర్తవ్వాలి.

నాలుగవ త్రైమాసికం (మార్చి ముగిసే నాటికి): ఆర్థిక సంవత్సరం ముగిసే నాటికి 100 శాతం పన్ను రికవరీ ప్రక్రియ పూర్తి కావాలి.

Read More

అర్ధ వేతన సెలవు (HPL) వినియోగించుకుంటే వార్షిక ఇంక్రిమెంట్ (Annual Increment) వాయిదా పడుతుందా?

1. ఇంక్రిమెంట్‌కు పరిగణించబడే సెలవులు (Service Counts for Increment):

కింది సెలవులను వినియోగించుకున్నప్పుడు, ఆ కాల పరిమితిని ఇంక్రిమెంట్‌కు అవసరమైన అర్హత సర్వీసుగా పరిగణిస్తారు. కాబట్టి వీటి వల్ల ఇంక్రిమెంట్ వాయిదా పడదు:

సంపాదిత సెలవు (Earned Leave - EL)

అర్ధ వేతన సెలవు (Half Pay Leave - HPL): అది వ్యక్తిగత కారణాల వల్ల (Private Affairs) కావచ్చు లేదా వైద్య కారణాల (Medical Certificate) వల్ల కావచ్చు.

ప్రత్యేక సాధారణ సెలవులు (Special Casual Leaves) మరియు ఇతర అనుమతించబడిన జీతం తో కూడిన ప్రత్యేక సెలవులు.

2) అసాధారణ సెలవు (Extraordinary Leave - EOL)

సాధారణంగా EOL కాల పరిమితిని ఇంక్రిమెంట్‌కు పరిగణించరు. అయితే కొన్ని సందర్భాల్లో మినహాయింపు ఉంటుంది:

వైద్య కారణాలు లేదా ఉన్నత విద్య: ఈ కారణాల వల్ల EOL పెట్టినప్పుడు, ఆ కాలాన్ని ఇంక్రిమెంట్‌కు పరిగణించే అధికారం అధికారులకు ఉంటుంది.

6 నెలల లోపు: శాఖాధిపతి (HOD) కి అధికారం ఉంటుంది.

6 నెలలు పైబడితే: ప్రభుత్వం (Government) ప్రత్యేక ఆదేశాలు జారీ చేయాల్సి ఉంటుంది.

ఇతర కారణాలు: పైన పేర్కొన్న అనుమతులు లేని పక్షంలో, EOL వినియోగించిన కాలానికి సమానంగా ఇంక్రిమెంట్ తేదీ వాయిదా పడుతుంది (Postponed). దీనివల్ల ఇంక్రిమెంట్ తేదీ శాశ్వతంగా మారిపోయే అవకాశం ఉంటుంది.

3) సెలవు కాలంలో ఇంక్రిమెంట్ తేదీ వస్తే? (Drawal of Increment):

ఒక ఉద్యోగి సెలవులో ఉన్నప్పుడు (CL మినహా) వారి వార్షిక ఇంక్రిమెంట్ తేదీ వస్తే, ఆ పెరిగిన జీతం నేరుగా సెలవు కాలంలో అందదు.

సెలవు జీతం (Leave Salary) ఎప్పుడూ సెలవుకు వెళ్లడానికి ముందు ఉన్న బేసిక్ పే ఆధారంగానే చెల్లించబడుతుంది.

విధుల్లో చేరిన తర్వాత: సెలవు ముగించుకుని తిరిగి విధుల్లో చేరిన రోజు నుండి మాత్రమే పెరిగిన బేసిక్ (New Increment) అమలులోకి వస్తుంది.

ఇది ఇంక్రిమెంట్ వాయిదా పడటం కాదు, కేవలం దానిని పొందే సమయం మారుతుంది. తదుపరి ఇంక్రిమెంట్లు యథావిధిగా సాధారణ సమయానికే వస్తాయి.

Read More

ఒకే నెలలో వార్షిక ఇంక్రిమెంట్ మరియు 6 ఇయర్స్ ఇంక్రిమెంట్ (స్పెషల్ గ్రేడ్) ఉంటే ఎలా మంజూరు చేయాలి?

ఒకే నెలలో సాధారణ వార్షిక ఇంక్రిమెంట్ మరియు 6 సంవత్సరాల సర్వీసు పూర్తి చేసుకున్న సందర్భంగా వచ్చే స్పెషల్ గ్రేడ్ స్కేల్ (Special Grade Scale) నియామకానికి సంబంధించిన నిబంధనలు ఈ క్రింది విధంగా ఉన్నాయి:

1. సాధారణ వార్షిక ఇంక్రిమెంట్ (Annual Grade Increment)

ప్రభుత్వం జారీ చేసిన ఉత్తర్వుల ప్రకారం, ఒక ఉద్యోగికి వార్షిక ఇంక్రిమెంట్ ఆ నెలలో ఏ తేదీన రావాల్సి ఉన్నా, దానిని సదరు నెల మొదటి తేదీ (1st of the month) నుండే మంజూరు చేయాలి.

దీని ప్రకారం, మార్చి నెలలో మీ సాధారణ ఇంక్రిమెంట్ తేదీ ఏదైనప్పటికీ, అది మార్చి 1 నుండి అమలులోకి వస్తుంది. దీనిని మంజూరు చేసే అధికారం సంబంధిత DDO (Drawing and Disbursing Officer) లేదా కార్యాలయ అధిపతికి ఉంటుంది.

2. ఆరు సంవత్సరాల స్పెషల్ గ్రేడ్ స్కేల్ (Special Grade Scale - AAS)

ఒకే కేడర్‌లో ఆరు సంవత్సరాల నిరంతర సర్వీసు పూర్తి చేసుకున్న ఉద్యోగికి ఆటోమేటిక్ అడ్వాన్స్‌మెంట్ స్కీమ్ కింద 'స్పెషల్ గ్రేడ్ స్కేల్' వర్తిస్తుంది.

తేదీ మరియు లెక్కింపు: FR 26 నిబంధనల ప్రకారం, ఇంక్రిమెంట్‌కు పరిగణించబడే 6 సంవత్సరాల సర్వీసు ఖచ్చితంగా ఏ తేదీకి పూర్తవుతుందో, అదే తేదీన ఈ స్కేల్ మంజూరు చేయబడుతుంది.

వేతన స్థిరీకరణ (Pay Fixation): దీనికి సంబంధించి వేతన స్థిరీకరణను FR 22 (a) (i) నిబంధనల ప్రకారం చేపడతారు. దీని ద్వారా ఉద్యోగికి ఒక అదనపు ఇంక్రిమెంట్ ప్రయోజనం లభిస్తుంది.

మంజూరు అధికారి: ఈ స్పెషల్ గ్రేడ్ స్కేల్‌ను మంజూరు చేసే అధికారం సాధారణంగా నియామక అధికారికి (Appointing Authority) ఉంటుంది. 

Read More

రిటైర్మెంట్‌కు ముందు NPS కంట్రిబ్యూషన్ ఎప్పుడు ఆపాలి?

డైరెక్టర్ ఆఫ్ ట్రెజరీస్ అండ్ అకౌంట్స్ (DTA) వారి సర్క్యులర్ మెమో (No. D4/3058/2013) ద్వారా PFRDA నిబంధనల ప్రకారం ప్రభుత్వ ఉద్యోగులు పదవీ విరమణ (Superannuation) పొందే సమయంలో, వారి పెన్షన్ సెటిల్మెంట్ ప్రక్రియ ఎటువంటి అభ్యంతరాలు లేదా ఆలస్యం లేకుండా సాఫీగా సాగడానికి వీలుగా NPS రికవరీ విషయం లో నిర్దిష్ట మార్గదర్శకాలు జారీ చేసింది.

ఎన్ని నెలల ముందు నిలిపివేయాలి?

పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీ (PFRDA) నిబంధనలు - 2015 లోని రెగ్యులేషన్ సంఖ్య 37 ప్రకారం, ఒక సబ్‌స్క్రైబర్ (ఉద్యోగి) రిటైర్ కావడానికి కనీసం 3 నెలల ముందు నుండి వారి జీతం నుంచి NPS కంట్రిబ్యూషన్ (10% రికవరీ) నిలిపివేయాలి.

ఉద్యోగి రిటైర్ అయిన వెంటనే వారి ప్రాన్ (PRAN) ఖాతాలోని నిధులను ఉపసంహరించుకోవడానికి (Withdrawal) ఎగ్జిట్ క్లెయిమ్‌ను సిద్ధం చేయాల్సి ఉంటుంది. ఒకవేళ రిటైర్మెంట్ వరకు కంట్రిబ్యూషన్లు కట్ చేస్తూ ఉంటే, ఆ చివరి నెలల నిధులు ప్రాన్ ఖాతాలో జమ కావడానికి సమయం పడుతుంది. దీనివల్ల మొత్తం సెటిల్మెంట్ ప్రక్రియ ఆలస్యమయ్యే అవకాశం ఉంది. కాబట్టి, చివరి 3 నెలల ముందే రికవరీ ఆపడం ద్వారా 'స్మూత్ ఎగ్జిట్' కు మార్గం సుగమం అవుతుంది.

DDO ల పాత్ర

సంబంధిత డ్రాయింగ్ అండ్ డిస్బర్సింగ్ ఆఫీసర్లు (DDOs) తమ పరిధిలో రిటైర్ కాబోతున్న ఉద్యోగుల జాబితాను ముందుగానే గమనించాలి.

రిటైర్మెంట్ తేదీకి 3 నెలల ముందు నుండి జీతం బిల్లులలో 10% NPS రికవరీని నిలిపివేయాలి.

ట్రెజరీ అధికారులు మరియు పే అండ్ అకౌంట్స్ అధికారులు (PAOs) ఈ నిబంధన అమలును పర్యవేక్షించాల్సి ఉంటుంది.

ఆ చివరి 3 నెలల నిధుల పరిస్థితి ఏమిటి?

NPS రికవరీ ఆపివేసిన ఆ చివరి మూడు నెలల కాలానికి సంబంధించి, ఉద్యోగి వాటా మరియు ప్రభుత్వ వాటాను (Employer Contribution) నేరుగా డీడీఓలే సదరు ఉద్యోగికి సర్దుబాటు (Settle) చేయాలి. అంటే, ఈ నిధులు ప్రాన్ (PRAN) ఖాతాలోకి వెళ్లకుండా నేరుగా ఉద్యోగికి అందుతాయి.

ప్రభుత్వ ఉత్తర్వుల ప్రకారం, పదవీ విరమణ పొందే ప్రతి NPS ఉద్యోగి ఈ సౌకర్యాన్ని ఉపయోగించుకోవాలి. తద్వారా రిటైర్ అయిన వెంటనే ఎటువంటి సాంకేతిక ఇబ్బందులు లేకుండా తమ పెన్షన్ నిధులను పొందే అవకాశం ఉంటుంది.

ఉద్యోగులు తమ కార్యాలయంలోని DDO గారికి లేదా ట్రెజరీ వారికి ఈ మెమో కాపీని సమర్పించి, మీ రిటైర్మెంట్ కు 3 నెలల ముందు నుండే రికవరీ నిలిపివేసేలా చర్యలు తీసుకోవచ్చు.

Read More